पृथ्वीराज साठे समर्थकांना एकत्र आणण्यात आले यश; पण… “हु इज द मास्टरमाईंड” ?
केज विधानसभा मतदारसंघाची निवडणूक ही नामनिर्देशन पत्र मागे घेतल्यानंतर निर्माण झालेल्या परिस्थितीत विद्यमान आ. नमिता मुंदडा आणि माजी आमदार पृथ्वीराज साठे यांच्या मध्ये सरळ होणार असल्याचे चित्र तयार झाले आहे. सुरुवातीच्या काळात पृथ्वीराज साठे हे तुल्यबळ उमेदवार ठरतील असे चित्र दिसून येत नव्हते मात्र आ. नमिता मुंदडा यांच्या सर्व विरोधकांना एकत्र आणण्यात यश आल्या नंतर आज पृथ्वीराज साठे हे तुल्यबळ लढत देऊ शकतील असे स्पष्ट चित्र आज निर्माण झाले आहे. या सर्व पार्श्वभूमीवर आ. नमिता मुंदडा यांच्या विरोधातील सर्व उमेदवार आणि नेत्यांची एकत्र मोट बांधण्यात यशस्वी ठरलेला मास्टर माईंड कोण आहे याची चर्चा आता मतदार संघात होऊ लागली आहे.
केज विधानसभा मतदारसंघाची ही निवडणूक या मतदारसंघातील अनुसूचित जाती आणि सर्वसाधारण प्रवर्गातील नेते आणि उमेदवारांसाठी अत्यंत महत्वाची आणि प्रतिष्ठेची मानली जाते. कारण या विधानसभा निवडणुकीनंतर जणगणना होणार असून मतदार संघाची पुनर्रचना होणार आहे. एखाद्या मतदार संघ किती वर्षे राखीव ठेवावा ही घटनेने घालून दिलेली मर्यादा २०२९ मध्ये संपणार हा मतदारसंघ खुल्या प्रवर्गासाठी आरक्षित राहण्याची मोठी शक्यता आहे. यामुळे अनुसूचित जाती प्रवर्गातील उमेदवारांसाठी ही निवडणूक शेवटची संधी आहे तर सर्वसाधारण प्रवर्गातील उमेदवारांना नेत्यांसाठी यानंतर हा मतदारसंघ खुल्या प्रवर्गासाठी खुला होणार असल्यामुळे प्रतिष्ठेची आहे. त्यामुळे या निवडणुकीत जो जिंकेल तो पुढील निवडणुकीत टिकेल हे सुत्र निश्चित करणारी ही निवडणूक आहे.
केज विधानसभा निवडणुकीसाठी सुरुवातीच्या काळात ४७ उमेदवारांनी अर्ज दाखल केल्यानंतर ही निवडणूक आ. नमिता मुंदडा, पृथ्वीराज साठे आणि प्रा. सौ. संगीता ठोंबरे यांच्यामध्ये तिरंगी लढत होईल असे वाटत होते. मात्र ४ नोव्हेंबर रोजी उमेदवारी अर्ज मागे घेण्यापुर्वी प्रा. सौ. संगीता ठोंबरे यांनी आपण या निवडणुकीतुन माघार घेत असून आपली राजकीय शक्ती पृथ्वीराज साठे यांच्या मागे उभी करणार असल्याचे जाहीर केले. प्रा. सौ. संगीता ठोंबरे यांच्या भुमिकेचे स्वागत करीत मनोज जरांगे पाटील यांच्या आवाहनाला प्रतिसाद देत इतर १-२ उमेदवारांनी पृथ्वीराज साठे यांना आपला पाठिंबा जाहीर केला.
अंबाजोगाई शहरातील मुंदडा कुटुंबियांचे प्रबळ राजकीय विरोधक माजी नगराध्यक्ष राजकिशोर मोदी यांनी ७ नोव्हेंबर रोजी संवाद मेळावा घेत कार्यकर्त्यांची भुमिका एकुण घेत आपल्यासह आपले हजारो कार्यकर्ते पृथ्वीराज साठे यांच्या प्रचार यंत्रणेत सहभागी होणार असल्याचे सांगितले, आणि ते प्रचाराला ही लागले.
राजकिशोर मोदी यांच्या पाठोपाठ केज येथील नगराध्यक्षा सौ. सिता बनसोड आणि तरुण इनामदार यांनी आपली राजकीय भुमिका स्पष्ट केली नसली तरी सौ. संगीता बनसोड या पृथ्वीराज साठे यांच्या प्रचार यंत्रणेत सहभागी झाल्याच्या दिसत आहेत. याशिवाय इतर अनेक छोटेमोठे नेते कार्यकर्ते पृथ्वीराज साठे यांच्या प्रचारयंत्रणेत सहभागी झाले आहेत.
विधानसभा निवडणुकीत एका उमेदवाराचे मागे एवढ्या सगळ्यांना एकत्र करून त्यांची शक्ती एका उमेदवाराचे मागे उभी करणे हे काही एका दिवसाचे व बिनडोक माणसाचे काम नाही. हे काम करण्यासाठी मतदारसंघात एखाद्या मास्टरमाईंड गेली अनेक दिवसांपासून निश्चित काम करीत असणार? कोण असेल हा चाणाक्ष मास्टरमाईंड याचा शोध घेण्यासाठी केज मतदार संघातील अनेक “चाणक्य” कामाला लागले आहेत.
