अश्विन महिन्यातील अमावास्येला लक्ष्मीपूजन झाल्यानंतर कार्तिक शुद्ध प्रतिपदेला बलिप्रतिपदा हा दिवस दिवाळी पाडवा म्हणून साजरा केला जातो. यावर्षी दिवाळी पाडवा आज मंगळवारी म्हणजेच १४ नोव्हेंबरला साजरा केला जाणार आहे.
सोने,घर, वाहन खरेदीसाठी उत्तम दिवस!
साडेतीन मुहूर्तांपैकी एक असलेला हा दिपावली पाडवा अतिशय शुभ मानला जातो. लक्ष्मीपूजननंतर दुसऱ्या किंवा तिसऱ्या दिवशी दिवाळी पाडव्याचा सण साजरा केला जातो. या दिवशी आवर्जून सोने खरेदी केली जाते. त्यासोबतच, नवीन घर, वाहन यांसारख्या अनेक गोष्टींच्या खरेदीना प्राधान्य दिले जाते.
काय आहे पौराणिक कथा!
पौराणिक कथेनुसार, राक्षस कुळात जन्मलेल्या बळीराजाने देवांचा पराभव केला. मात्र, तो दानशूर होता. कोणत्याही गोष्टीचे दान करताना तो मागे पुढे पाहत नसे. एकदा त्याने यज्ञ केले. त्यावेळी भगवान विष्णू बटू वामनाचा अवतार घेऊन त्याच्याकडे भिक्षा मागायला गेले. तेव्हा बळी राजाने त्याला काय हवे आहे असे विचारले, यावर बटू वामनाने त्याच्याकडे तीन पाऊल जमीन मागितली. बळीराजाने विचार न करता दान दिले. दान मिळताच वामनाने विराट रूप धारण केले आणि पहिल्या पावलाने पृथ्वी आणि दुसऱ्या पावलाने संपुर्ण अंतराळ व्यापून घेतले.
बळीराजाच्या दानशुरतेची आणि क्षमाशीलतेची करतात पुजा!
त्यानंतर बटू वामनाने त्याला तिसरे पाऊल कुठे ठेऊ असे विचारले. यावर बळीराजा म्हणाला की, तो माझ्या डोक्यावर ठेवा. वामनाने बळीराजाच्या डोक्यावर पाय ठेवून त्याला पाताळलोकी पाठवले. पाताळात बळीराजाचे राज्य स्थापन झाले. पाताळात जाण्याआधी बळीराजाने पृथ्वीवर दरवर्षी तीन दिवस तरी माझे राज्य म्हणून ओळखले जावे असा एक वर मागितला. वामनाने हा वर दिला. वामनाने दिलेल्या वरामुळेच कार्तिक शुद्ध प्रतिपदेला बळीराजाच्या दानशूरतेची आणि क्षमाशीलतेची पूजा करतात!
🙏
