विधानसभा मतदारसंघ निवडणुकीत आपला उमेदवारी अर्ज वापस घेण्यासाठी आता फक्त काही मिनिटांचा कालावधी शाल्लक राहिला असून या मतदारसंघातील प्रबळ दावेदार माजी आमदार प्रा. सौ. संगीता ठोंबरे यांच्या उमेदवारी अर्जाकडे मतदारांचे लक्ष लागले आहे.
केज विधानसभा मतदारसंघात प्रा. सौ. संगीता ठोंबरे यांनी यापुर्वी २०१४ च्या झालेल्या तिरंगी लढतीत भाजपाच्या तिकीटावर विजय मिळवून या मतदारसंघाचे प्रतिनिधित्व केले होते. मात्र २०१९ च्या निवडणुकीत भाजपाने ऐनवेळी उमेदवारी नाकारल्याने त्या निवडणूक रिंगणातुन बाहेर पडल्या होत्या.
२०२४ घ्या निवडणुकीत सुरुवातीलाच त्या सक्रीय झाल्या होत्या. भाजप, राष्ट्रवादी काँग्रेस शरद पवार गट आणि नंतर मनोज जरांगे पाटील यांच्या त्या संपर्कात होत्या. मनोज जरांगे पाटील यांनी केज विधानसभा मतदारसंघात अपक्ष उमेदवाराला पाठिंबा देण्याचे जाहीर केल्यानंतर त्यांच्यि आशा पुन्हा पल्लवीत झाल्या होत्या. मात्र आज सकाळी मनोज जरांगे पाटील यांनी निवडणुकीच्या रिंगणातुन माघार घेत असल्याचे माध्यमांना सांगितले होते. त्यामुळे प्रा. संगीता ठोंबरे यांना दिसणारा आशेचा किरण ही धुसर झाला आहे.
बीड जिल्ह्याचे खा. बजरंग सोनवणे हे गेली तीन दिवसांपासून प्रा. सौ. संगीता ठोंबरे यांच्या सोबत उमेदवारी अर्ज वापस घेण्यासंदर्भात चर्चा करीत असल्याची माहिती असून त्यांचा पाठिंबा राष्ट्रवादी काँग्रेस शरद पवार गटाला मिळवून देण्यासाठी प्रयत्न करीत असल्याची ही माहिती आहे.
यासर्व पार्श्वभूमीवर आता उमेदवारी अर्ज वापस घेण्यासाठी काही मिनीटांचा अवधी शिल्लक राहिला असता प्रा. सौ. संगीता ठोंबरे या आपला उमेदवारी अर्ज काढणार का ठेवणार याकडे मतदारांचे लक्ष लागले आहे.
