जानेवारीच्या मध्यात वाढु शकतात कोरोनाचे रुग्ण; केंद्रीय आरोग्य मंत्रालयाची माहिती
केंद्रीय आरोग्य मंत्रालयाने म्हटले आहे की, जानेवारीच्या मध्यात भारतात कोरोनाचे रुग्ण वाढू शकतात. मागील ट्रेंडचे विश्लेषण केल्यानंतर असे मानले जाते की, पुढील 40 दिवस देशासाठी कठीण असतील. सूत्रांनी दिलेल्या माहितीनुसार, देशात कोरोनाची आणखी एक लाट येऊ शकते. अशा परिस्थितीत सर्व राज्ये आणि केंद्रशासित प्रदेशांमधील आरोग्य सुविधांचा आढावा घेतला जात आहे.
३ दिवसात ३९ आंतरराष्ट्रीय प्रवासी पॉझिटिव्ह
याआधीही पूर्व आशियावर परिणाम झाल्यानंतर फक्त 30 ते 35 दिवसांतच ही नवीन लाट भारतात आल्याचे दिसून आले आहे. हा एक ट्रेंड राहिलेला आहे, ज्याच्या आधारे हा दावा केला जात आहे. दुसरीकडे, बुधवारी चेन्नई विमानतळावर दुबईतील दोन प्रवासी कोविड पॉझिटिव्ह आढळले आहेत. हे दोघेही तामिळनाडूतील पुदुक्कोट्टई येथील अलंगुडी जिल्ह्यातील रहिवासी आहेत. त्यांचे नमुने जीनोम सिक्वेन्सिंगसाठी पाठवण्यात आले आहेत. यासोबतच गेल्या 3 दिवसांत 39 आंतरराष्ट्रीय प्रवासी पॉझिटिव्ह आढळले आहेत. यामध्ये चीनमधून श्रीलंकेमार्गे तामिळनाडूत आलेल्या महिला आणि तिच्या 6 वर्षीय मुलीचा समावेश आहे.
24 डिसेंबर ते 26 डिसेंबरपर्यंत 498 उड्डाणे तपासण्यात आली आहेत. यादरम्यान 1,780 नमुने घेण्यात आले. त्यापैकी 39 पॉझिटिव्ह आढळले आहेत. हे जीनोम सिक्वेन्सिंगसाठी पाठवण्यात आले आहेत. कोरोनाचीतयारी तपासण्यासाठी मंगळवारी देशातील जवळपास सर्व राज्यांमध्ये मॉक ड्रिल करण्यात आले..
मंगळवारी देशात १८८ तर केरळ मध्ये ३९ रुग्ण!
मंगळवारी देशात 188 कोरोना रुग्ण आढळले. त्यापैकी सर्वाधिक 39 रुग्ण केरळमध्ये आढळून आले आहेत. तथापि, कुठूनही संसर्गामुळे मृत्यूचे वृत्त नाही. सक्रिय कोविड रुग्णांची संख्या 2,495 आहे. देशात आतापर्यंत 4.46 कोटी कोरोना रुग्णांची नोंद झाली आहे. आरोग्य मंत्रालय आणि कोरोना आऊटब्रेक येथून डेटा घेण्यात आला आहे.
देशातील कोरोना अपडेट्स…
एअर इंडिया एक्सप्रेसने UAE मधून येणाऱ्या प्रवाशांसाठी मास्क आणि सोशल डिस्टन्सिंग अनिवार्य केले आहे. आरोग्य मंत्रालयाच्या म्हणण्यानुसार, देशातील कोरोना लसीकरणाचा आकडा 220 कोटी डोसच्या पुढे गेला आहे.
बिहारमध्ये कोरोनाच्या रुग्णांमध्ये 10 पटीने वाढ झाली आहे. राज्याच्या आरोग्य मंत्रालयाच्या म्हणण्यानुसार, रविवारपर्यंत राज्यात एकही सक्रिय रुग्ण आढळला नव्हता. आता येथील प्रकरणांची संख्या 14 झाली आहे. त्यापैकी 12 एकट्या गयामध्ये आहेत.
नेझल लस शासकीय ३२५ रु. ; खाजगीत ८०० रु.
कोरोनाच्या पहिल्या अनुनासिक लसीला मंजुरी दिल्यानंतर चार दिवसांनी केंद्र सरकारने त्याची किंमत निश्चित केली आहे. भारत बायोटेकची ही लस ३२५ रुपयांत सरकारी रुग्णालयांमध्ये मिळेल. तर खासगी रुग्णालयांमध्ये यासाठी ८०० रुपये मोजावे लागणार आहेत. जानेवारीच्या शेवटच्या आठवड्यापासून ही लस उपलब्ध होणार आहे. केंद्राने 23 डिसेंबर रोजी जगातील पहिल्या अनुनासिक कोरोना लसीला मान्यता दिली होती.
कोरोनाचा सामना करण्याच्या तयारीसंदर्भात मंगळवारी देशभरातील कोविड आरोग्य केंद्रांमध्ये मॉक ड्रिल करण्यात आले. केंद्रीय आरोग्य मंत्री मनसुख मांडविया स्वत: दिल्लीतील सफदरगंज हॉस्पिटलमध्ये तयारीचा आढावा घेण्यासाठी पोहोचले होते.
कोरोनाला सामोरे जाण्याची तयारी…
मध्यप्रदेश
राज्याचे आरोग्य मंत्री डॉ. प्रभुराम यांनी सीहोर जिल्हा रुग्णालयात कोविडच्या तयारीचा आढावा घेतला. ते म्हणाले की, सध्या राज्यात कोविडच्या नवीन प्रकाराचे एकही रुग्ण आढळलेले नाहीत, मात्र सावधगिरी बाळगणे आवश्यक आहे. त्यांनी रुग्णालयाच्या आवारात काही लोकांना मास्कही लावले.
दिल्ली
दिल्लीचे उपमुख्यमंत्री मनीष सिसोदिया यांनी मंगळवारी एलएनजेपी हॉस्पिटलमध्ये कोरोनाचा सामना करण्याच्या तयारीचा आढावा घेतला. ते म्हणाले की, 2 हजारापैकी 450 खाटा कोविडसाठी रुग्णालयात आरक्षित करण्यात आल्या आहेत. गरज भासल्यास त्यांची संख्या गेल्या वेळेप्रमाणे वाढवता येईल. मागील वेळी कोरोनाच्या काळात या रुग्णालयात २५ हजारांहून अधिक बाधितांवर उपचार करण्यात आले होते.
हरियाणा
हरियाणाचे राज्याचे गृहमंत्री अनिल विज म्हणाले की, आम्ही सर्व तयारी केली आहे, कोणत्याही गोष्टीची कमतरता नाही. आमच्याकडे प्रत्येक जिल्ह्यात चाचणीसाठी आरटी-पीसीआर मशीन आहेत, ५० पेक्षा जास्त खाटा असलेल्या सर्व हॉस्पिटलमध्ये PSA प्लांट बसवण्यात आले आहेत आणि आमच्याकडे सुमारे ६,००० ऑक्सिजन कॉन्सन्ट्रेटर आणि बेड आहेत.
गुजरात : राज्य सरकारचे आरोग्य अधिकारी मंगळवारी कोविड केंद्रांवर मॉक ड्रिलसाठी आले. गरज भासल्यास कोरोना रुग्णांसाठी किमान एक लाख बेड आणि व्हेंटिलेटर असलेले १५ हजार आयसीयू तयार करण्यात आल्याचे गुजरात सरकारने सांगितले.
कर्नाटक
कर्नाटकचे आरोग्यमंत्री के. सुधाकर म्हणाले की, राज्यात कोरोनाच्या नवीन प्रकार BF.7 चा धोका कमी आहे, परंतु लहान मुले, वृद्ध आणि गर्भवती महिलांनी काळजी घेणे आवश्यक आहे.
सिक्कीम
सिक्कीमचे राज्य सरकारने मंगळवारी एक ऍडव्हायजरी जारी करून लोकांना राज्यात कोविड-19 चा पुन्हा संसर्ग रोखण्यासाठी सावधगिरीचे उपाय करण्यास सांगितले.
केरळमधील सर्वाधिक नवीन रुग्ण मीडिया रिपोर्ट्सनुसार, या महिन्यात 23 डिसेंबरपर्यंत भारतात सुमारे 83% कोविड मृत्यू आणि 38% नवीन रुग्ण केरळमधील आहेत. ऑक्टोबरमध्ये देशात एकूण 64,357 नवीन प्रकरणे नोंदवली गेली, त्यापैकी 24% केरळमधील आहेत. त्या काळात व्हायरसमुळे 366 मृत्यू झाले होते, ज्यामध्ये राज्याचा वाटा सर्वाधिक 60% होता.
डिसेंबर मध्ये ४,४६७ प्रकरणे;६२ मृत्यू!
पुढील महिन्यात देशभरात नवीन प्रकरणांची संख्या 19,204 वर घसरली. ज्यामध्ये केरळचे योगदान 22% होते. तर, नोव्हेंबरमध्ये 176 मृत्यू झाले, त्यापैकी 63% राज्यात झाले. या महिन्यात म्हणजेच 23 डिसेंबरपर्यंत देशभरात 4,467 प्रकरणे आणि 62 मृत्यूची नोंद झाली आहे.
